Vantar mynd af kappanum.

Mér finnst vanta mynd af Sir Fitzroy með fréttinni í stað nýjasta leikarans, sem í mínum augum er ekki sá fulltrúi Bonds sem er manni efst í huga.

Ekta Bond-munir á uppboði

Réttindi í?

Er hægt að hafa veiðiréttindi í makríl?

Ég hélt að við gætum bara haft réttindi til veiða á makríl en hvað veit ég svo sem...

 

Ég er bara leikmaður og fer í Grafarvog þó skiltin segi Grafavogur og enn bíð ég eftir því að fólk hætti að pissa í sig (t.d. Ólafur Ragnar í auglýsingu Dagvaktarinnar).  Finnst tilhugsunin um að drekka piss alveg einstaklega ógeðfelld en það er kannski bara ég!

Vilja banna innflutning á mjöli og lýsi frá Íslandi

Nagladekk

Það hlýtur að vera spennandi og vonandi ánægjuleg upplifun fyrir menn þarna úti að upplifa snjó í fyrsta skiptið. 
Sjálf gæti ég ekki hugsað mér lífið án hans og hlakka til snjókomunnar um leið og ég vonast eftir góðum og miklum snjóavetri.

Tal um snjó nú minnir mig hins vegar á nagladekk og þá sorglegu staðreynd að enn finnast bílar á nagladekkjum í umferðinni í Reykjavík.

Í byrjun júlí, skömmu áður en ég fór í sumarfrí, ók ég sem leið lá um götur borgarinnar þegar ég tók eftir gamalkunnugu hljóði.  Ég opnaði gluggann gapandi af undrun og það fór ekkert á milli mála, við hlið mér var bifreið á nagladekkjum!
Þarna var á ferðinni ungur maður klæddur jakkafötum og leit út fyrir að vera á heimleið frá vinnu rétt eins og það væri ekkert eðlilegra en að keyra um á nagladekkjum í júlí.  Ég varð svo yfir mig hneyksluð að ég tók niður bílnúmerið: AV-880

Ég gerði að vísu ekkert með það,  enda fór ég tveimur dögum síðar í sumarfrí og gleymdi öllu saman þangað til ég las í einhverju blaðanna að lögreglan í Reykjavík hefði tekið einhvern akandi um á nagladekkjunum.  Ég sá fyrir mér að jakkafatavinur vor á bláa bílnum hefði fengið digra sekt og áminningu því varla væru fleiri sem ækju um á nagladekkjum yfir hásumarið.

En viti menn, í gær varð ég enn vör við bíl á nagladekkjum hér í Reykjavík.
Ég ætla samt að leyfa mér að vona að eigandi Daihatsubifreiðarinnar YV-223 hafi verið að taka hann í notkun aftur eftir langt hlé og nauðsynlega þurft að koma honum á milli staða frekar en að hann sé svo óforskammaður að hann víli ekki fyrir sér að aka árið um kring á nagladekkjunum.

Snjór í Kenýa

Fasteignasölur - fasteignaleit

Það er til nóg af húsum ætluð nýríkum og flottræflum, það vantar ekki.
Það er líka til nóg af einsleitum óaðlaðandi íbúðarkumböldum og enn eru verktakar að bæta slíkum á markaðinn sem gerir fasteignaleit óaðlaðandi og tímafreka.

Fasteignasíða mbl.is er með ágætis leitarvél en þó eru þar ýmsir gallar til dæmis:
- Það vantar að gera greinarmun á bílskýli og bílskúr,
- það er ekki hægt að leita að ákveðnum svefnherbergjafjölda því fasteignasalar skrá alla króka og kima sem herbergi og svo þarf að lesa alla lýsinguna áður en maður kemst að því að "þriðja svefnherbergið" er borðstofan eða eitthvað álíka
- og maður fær í leitarniðurstöður allar nýbyggingar á höfuðborgarsvæðinu þrátt fyrir að hafa ekki hakað í valmöguleikann Nýbyggingar. 

Allt eru þetta atriði sem angra mann og tefja leit.  Ég var því ánægð með að opnaður væri nýr vefur fasteignasala fasteignir.is og hugsaði mér gott til glóðarinnar.  Rétt í þessu gerði ég tilraun til að hefja fasteignaleit á nýju síðunni og rak mig strax á að þar er ekki möguleiki að setja inn bílskúr sem leitarmöguleika.  Þar með fór glansinn af nýju síðunni því ekki nenni ég að lesa í gegn um fleiri hundruð eignalýsingar til að finna þessar örfáu sem gætu komið til greina, má ég þá heldur biðja um fasteignaleit mbl.is þó ófullkomin sé.

mbl.is birtir greinilega ekki fréttir um það sem veitir þeim beina samkeppni... 

Dýrasta húsið kostar 180 milljónir

Villandi að tala um verð per máltíð.

Mér finnst afskaplega villandi að tala um verð á hverri máltíð, hver er viðmiðunin varðandi dagafjölda í mánuði?

Foreldrar borga gjald per mánuð og er það oftast jafnaðargjald þar sem ágúst, jól og páskar eru tekin inn í dæmið.

Okkar skóli býður t.d. upp á mataráskrift á 5500 kr. á mánuði.

Í fljótu bragði sýnist mér samkvæmt matseðli septembermánaðar vera í boði:

• Unnar matvörur sem ekki eru hollar............9 skipti í mánuðinum.
• Snarl eða létt máltíð.....................................2 skipti í mánuðinum.
• Fiskmáltíðir (hollar sem óhollar)...................9 skipti í mánuðinum.
• Máltíðir sem geta verið hollar.......................5 skipti í mánuðinum.

Samtals eru þetta 25 máltíðir (að ágúst meðtöldum) en þess ber að geta að máltíð getur verið holl ef hún er elduð á staðnum úr fersku hráefni en að sama skapi óholl ef hún er eingöngu samsett úr unnum vörum. 

 

Hækkun á gjaldskrá mötuneyta

Ætli það tengist...

Ætli það sé framhaldsrannsókn vegna innbrots í Hveragerði um helgina???

Eitthvað erindi virtust þjófarnir sem stálu bíl bróður míns eiga í Hveragerði a.m.k. (sjá 2 fyrri færslur mínar)

Andskotans ekkisens aumingjaskapur, heirðvirt fólk vinsamlegast afsakið orðbragðið. 

Húsleit í Hveragerði og Selfossi

Bíllinn kominn í leitirnar

og er kominn í hendur eiganda síns.  Eftir að hafa verið notaður í innbrot í Hveragerði og ekið utanvegar, trúlega í trjágróðri miðað við skemmdirnar á bílnum þá hefur bíllinn að lokum orðið bensínlaus.  Við svo búið hafa þjófarnir ætlað að redda málunum en ekki vildi betur til en svo að þeir settu díselolíu á bíl með bensínvél og þar með lauk þeirri bílferð hvað svo sem þeir hafa tekið sér fyrir hendur í framhaldinu. 

Tilkynning: Bifreið stolið aðfaranótt 30. ágúst.

Tilkynning:
Bifreiðin Toyota Hilux JS-497 sem er dökkgrænn Double Cab, bensínbíll, var stolið af bílastæði í Grafarvogi í nótt sem leið.   Talið er að bifreiðin hafi verið notuð í vafasömum tilgangi (sást á vettvangi utan Reykjavíkur) en ekki er vitað hvar bíllinn er niðurkominn nú.  Ef athugull lesandi kemur auga á bílinn, vinsamlegast hafið þegar samband við lögreglu.
 

 

Já, Það á ekki af honum bróður mínum að ganga! 
Hann á afmæli í dag (Enn og aftur til hamingju með afmælið elsku bróðir) og dagskrá dagsins var ákveðin því þeir félagarnir ætluðu að steggja vin sinn í dag með heljarinnar húllumhæi en þegar bróðir minn ætlar að leggja af stað til að hitta félagana, var bíllinn hans horfinn!
Honum hafði verið stolið af bílastæði fyrir utan heimili bróður míns án þess að nokkur yrði var við.
Bróðir minn mátti því una við að sitja næstu stundir á lögreglustöðinni við að gefa skýrslu og missa þar með að mestu af steggjuninni.  Hann situr því nú með sárt ennið á afmælisdaginn, miður sín af áhyggjum yfir bílnum.

Kæru bloggarar, vinir og vandamenn, það er ekki vitað hvar á landinu bíllinn er niðurkominn en hann er greinilega í höndum óvandaðra. Mig langar til að biðja ykkur um að svipast um eftir bílnum og ef þið komið einhverstaðar auga á hann, látið þá lögreglu STRAX vita.

smá ps.  Ég mun setja inn tilkynningu hér á bloggið um leið og bíllinn er fundinn, en á meðan biðjum við um aðstoð ykkar við að finna bílinn.

Mynd af bílnum:

Á. K. Þáttastjórnandi með þágufallssýki.

Með kveðju til Ásgeirs Kolbeinssonar og ráðamanna þáttarins Sjáðu:

Mér til skelfingar sagði Ásgeir "honum dreymir" í umsögn sinni um bíómynd í þættinum Sjáðu á Stöð tvö fyrir stundu.  Þetta er til skammar!

Einu sinni þegar ég á mínum yngri árum kom í heimsókn til Reykjavíkur og vildi ólm falla inn í hópinn hermdi ég eftir flestu sem fyrir mig bar.  Eftir áminningu heima fyrir sneri ég mér að móður minni og spurði: "Af hverju má ég ekki segja mér langar???, allir hinir krakkarnir gera það!!"

Þetta varð til þess að ég uppgötvaði að í borginni væri talað annað tungumál en í sveitinni.  Á þeim árum sem liðið hafa síðan hefur ástandið stundum verið svolítið betra og stundum enn verra en eftir að fríblöðin litu dagsins ljós er eins og að borgarbúar hafi að mestu glatað því sem eftir var af málfarsmetnaði sínum.

Betur má ef duga skal ef við viljum skilja hvert annað.

Útrýmum þágufallssýki!

 

Unglingar í vanda

Lögreglan í Reykjavík er því miður ekki sú skilvirkasta þegar kemur að unglingum í vanda, þeir eru jú of margir og lögregla og barnavernd of fáliðuð til að sinna málum sem skyldi.

Þegar haft er samband við lögreglu í Reykjavík vegna unglings í vanda og foreldrar vilja að hafin sé leit er manni bent á barnaverndarnefnd, þá þarf tíma til að ná sambandi við þá, svo þarf að úthluta málinu til starfsmanns og svo þarf að hitta hann og setja hann inn í hvað hefur gengið á.
Slíkt er ekki uppbyggilegt fyrir foreldra sem bíða milli vonar og ótta um líf og limi unglings hvort sem um er að ræða ungling í uppreisn eða ungling í vímuefnavanda.

Ef ná á í barnaverndarnefnd utan skrifstofutíma þarf að hringja í neyðarlínuna, 112 og setja starfsmann neyðarlínu inn í málið til þess að hann fáist til að gefa samband við barnaverndarfulltrúa sem þarf svo að útskýra málið fyrir, aftur frá byrjun.  Persónulega finnst mér nóg á foreldra lagt þó að þeir þurfi ekki að eyða allri sinni orku í að útskýra aftur og aftur fyrir Pétri og Páli hvernig sé í pottinn búið áður en samband næst við einhvern sem raunverulega hefur eitthvað með málið að gera.

Það að fá áheyrn barnaverndarnefndar er heldur ekki alltaf nóg, eitt sumarið datt t.d. mál unglings í fíkniefnavanda uppfyrir vegna sumarleyfa starfsfólks.  Einhverjum láðist að senda málið annað og þann mánuð var unglingurinn á götunni án þess að nokkuð fengist að gert fyrr en sá starfsmaður sem hafði málið á sinni könnu, kom aftur úr fríi.   Á meðan beið laust pláss á meðferðarheimili eftir því að barnaverdarnefndarfulltrúinn kláraði pappírsvinnuna svo unglingurinn gæti mætt á svæðið.

Ég trúi ekki að þetta sé eina skiptið sem mál hafa óvart strandað hjá barnaverndarnefnd og á meðan engdust foreldrarnir og vissu ekki hvar barnið þeirra var niðurkomið en unglingurinn þvældist um bæinn í vímu og rugli og gisti í ruslageymslum borgarinnar. 
Foreldrarnir hringdu í lögreglu sem vísaði á barnaverndarnefnd sem vísaði á hina og þessa starfsmenn sem ýmist voru í fríi eða könnuðust ekki við málið og ætluðu ekki að skipta sér af því.

Þetta er því ekki jafn einfalt og ætla mætti en samt eru það foreldrarnir sem sitja undir ásökunum bloggheima/þjóðfélagsins þegar efla þyrfti starf barnaverndarnefndar og leysa manneklu lögreglunnar í höfuðborginni til þess að taka megi á þessum málum um leið og þarf á að halda.

Mér skilst að þessi tiltekna stúlka sé fundin og óska ég henni og foreldrum hennar alls hins besta.

Lýst eftir 13 ára stúlku